Argentina futbol assotsiatsiyasi (AFA) AQSHning Mayami shahrida joylashgan VID promouterlik kompaniyasi tomonidan tashkilot va futbolchi Lionel Messiga nisbatan berilgan ko‘p millionli da’voni asossiz deb atadi. Bu haqda TMZ Sports xabar bermoqda.

VID kompaniyasi 2025-yil oktabr oyida AQSHda o‘tkazilgan ikkita ko‘rgazmali o‘yin uchun AFAga 7 million dollar to‘laganini da’vo qilmoqda. Shartnomaga ko‘ra, Messi agar jarohati bo‘lmasa, har bir o‘yinda kamida 30 daqiqa maydonda harakat qilishi shart bo‘lgan. Biroq, futbolchi Venesuelaga qarshi bahsda jismonan sog‘lom bo‘lishiga qaramay, maydonga tushmagan. Buning natijasida kompaniya katta miqdorda zarar ko‘rganini bildirib, sudga murojaat qilgan.
Assotsiatsiya vakili barcha majburiyatlar to‘liq bajarilganini va kompaniyaning o‘zi AFA’dan qarzdor ekanini ta’kidladi:

“AFA VID kompaniyasi tomonidan topshirilgan da’vo arizasidan xabardor. Tashkilotimiz tegishli kelishuvlar bo‘yicha barcha majburiyatlarini, jumladan, 2025-yil oktabr oyidagi ikkala o‘yinda ham milliy terma jamoaning ishtirokini to‘liq ta’minlagan. Buni isbotlovchi shartnomalar, to‘lov hujjatlari va yozishmalar sudda taqdim etilishi mumkin. AFA o‘z manfaatlarini faol himoya qiladi va da’vogarlardan tashkilotga to‘lanishi lozim bo‘lgan millionlab dollarlarni undirishni talab qiladi”, deyiladi bayonotda.

Eslatib o‘tamiz, Argentina terma jamoasi o‘sha vaqtda AQSHda Venesuela (1:0) va Puerto-Riko (6:0) jamoalariga qarshi bahs olib borgan edi. Hozirda sud jarayonlari davom etishi kutilmoqda.