Osiyo Futbol Konferensiyasi (OFK) navbatdagi qit’a birinchiligi oldidan jamoalarni savatchalarga ajratib chiqdi. Bu galgi taqsimotda FIFAning 1-apreldagi yangilangan reytingi asosiy mezon bo‘lib xizmat qildi. 

O‘zbekiston milliy terma jamoasi ayni paytda FIFA reytingida 50-pog‘onani egallab turibdi va shuning evaziga 1-savatchadan joy oldi. Bu esa Fabio Kannavaro jamoasining guruh bosqichida qit’aning eng kuchli jamoalari — Yaponiya, Eron va Janubiy Koreya kabi raqiblar bilan to‘qnash kelmaslik imkonini beradi.

Savatchalar tarkibi:

  • 1-savatcha: Saudiya Arabistoni (mezbon), Yaponiya, Eron, Janubiy Koreya, Avstraliya, O‘zbekiston.
  • 2-savatcha: Qatar, Iroq, Iordaniya, BAA, Ummon, Suriya.
  • 3-savatcha: Bahrayn, Tailand, Xitoy, Falastin, Vyetnam, Tojikiston.
  • 4-savatcha: Qirg‘iziston, Livan yoki Yaman, KXDR, Indoneziya, Quvayt, Singapur.

E’tiborli jihati shundaki, avvalgi yillarda OFK savatchalarni shakllantirishda “gibrid” uslubdan foydalanar edi. Bunda ham FIFA reytingi, ham Jahon chempionati saralashidagi natijalar inobatga olingan. Masalan, ushbu qoida sabab 2019-yilgi Osiyo Kubogi qur’asida O‘zbekiston 3-savatchadan 2-savatchaga ko‘tarilgan edi.

Bu safar faqatgina FIFA reytingiga tayanilgani bir qator kutilmagan holatlarni keltirib chiqardi. Xususan, Osiyo Kubogining amaldagi chempioni Qatar 2-savatchaga tushib qolgan bo‘lsa, Jahon chempionati saralashining 3-bosqichida qatnashgan Qirg‘iziston, Indoneziya va Quvayt kabi jamoalar eng quyi — 4-savatchadan joy oldi.

Dastlab 11-aprelga belgilangan qur’a tashlash marosimi Yaqin Sharqdagi vaziyat hamda barcha hamkorlarning to‘liq ishtirokini ta’minlash maqsadida boshqa muddatga ko‘chirildi. Turnirda qatnashadigan 24 ta jamoadan 23 tasi allaqachon ma’lum. So‘nggi yo‘llanma egasi 4-iyun kuni Livan va Yaman terma jamoalari o‘rtasidagi bahsdan so‘ng aniqlanadi. Guruh bosqichiga qur’a tashlash marosimi esa 9-may sanasiga belgilandi.