Gruziya xorijdagi kompaniyalar uchun masofadan ishlaydigan chet elliklarga C5 toifasidagi yangi vizani joriy etmoqda. 

Parlament “Chet elliklar va fuqaroligi bo‘lmagan shaxslarning huquqiy maqomi to‘g‘risida”gi qonun loyihasini bir ovozdan ma’qulladi. Yangi viza asosida Gruziyada 12 oygacha qolish mumkin. C5 toifasiga mamlakatga turistik maqsadlarda keladigan va Gruziyadan tashqaridagi kompaniyada onlayn ishlaydiganlar kiradi.

Viza arizachining turmush o‘rtog‘i va voyaga yetmagan farzandlarini ham qamrab oladi. Uni rasmiylashtirish narxi 20 dollardan 500 dollargacha baholanmoqda.

“Geosiyosiy raqobat natijasida migratsiya oqimlari sezilarli darajada o‘zgardi. Xususan, Yaqin Sharqdagi voqealar fonida yangi migratsiya tendensiyalari yuzaga keldi. Gruziya jozibador viza rejimi orqali yuqori maoshli masofaviy xodimlarni jalb qilish imkoniyatiga ega”, dedi Yevropa Ittifoqiga integratsiya qo‘mitasi raisi Levan Maxashvili.

C5 vizasi ko‘p martalik bo‘lib, 5 yilgacha berilishi mumkin. Hukmron “Gruziya orzusi” partiyasi vakillari shunga o‘xshash viza toifasi allaqachon ko‘plab mamlakatlarda borligini ta’kidladi.

“Yuqori daromadli sayyohlar odatda mamlakatda ko‘proq pul sarflaydi, bu esa turizmdan tushadigan daromadlarni oshiradi, xizmat ko‘rsatish sohasini, jumladan, mehmonxonalar, restoranlar va boshqa biznes turlarini mustahkamlaydi hamda iqtisodiyotga xorijiy valyutaning qo‘shimcha kirib kelishini ta’minlaydi”, deya qo‘shimcha qildi Levan Maxashvili.

Shunga o‘xshash vizani joriy etgan ayrim davlatlar:

Estoniya dunyoda birinchilardan bo‘lib 2020-yilda shunday vizani ishga tushirdi. Arizachining oylik daromadi kamida 4 500 yevro (soliqlardan tashqari) bo‘lishi lozim. Bu turdagi viza 1 yilga beriladi.

Portugaliya 2022-yilda “raqamli ko‘chmanchilar” uchun viza joriy etdi. Arizachi Portugaliyadan tashqaridagi kompaniyada ishlashi va oylik daromadi kamida 3 280 yevro bo‘lishi kerak. Ushbu viza bilan Shengen hududida erkin harakatlanish va Portugaliyada 1 yildan 5 yilgacha yashash mumkin.

Ispaniyaning “raqamli ko‘chmanchi” vizasi 5 yilgacha uzaytiriladigan yashash ruxsatnomasi bo‘lib, u YIga kirmaydigan fuqarolarga mamlakatda yashab, xorijdagi kompaniya yoki mijozlar uchun masofadan ishlash imkonini beradi. Vizani Ispaniyadan turib (3 yillik ruxsat bilan) yoki o‘z mamlakatidan 1 yillik viza olib, keyinchalik uzaytirish orqali olish mumkin. Arizaga turmush o‘rtog‘i va farzandlarni ham qo‘shish mumkin.