O‘zbekistonning 3 ta hududida 5 ta quduqdan gaz chiqdi, bitta kon qayta tiklandi. Bu haqda “O‘zbekneftgaz” matbuot xizmati xabar qildi.

Qayd etilishicha, Qoraqalpog‘istonda yangi va yuqori bosimli kon topilgan, Qashqadaryoda 3 ta, Buxorda esa 1 ta quduqdan gaz oqimi olingan. Hozirda tabiiy gazning debiti hamda tarkibi aniqlanmoqda.

Muborakda joylashgan “Yangi Kultak” konidagi 5 va 10-sonli ishlab chiqarish quduqlarining har biridan kunlik taxminan 245 ming metr kub, Sho‘rtanda joylashgan “Marvarid” konidagi 4-son qidiruv qudug‘idan esa kunlik taxminan 450-500 ming metr kub bo‘lgan tabiiy gaz chiqib turibdi.

Shu bilan bir qatorda, Ustyurt hududidagi o‘z vazifasini bajarib bo‘lgan “Shimoliy Berdaq” konining 7-son qudug‘i qayta taʼmirlanib, undan ham gaz oqimi olingan.

Avvalroq Mo‘ynoqdagi yangi quduqdan ham sanoat miqyosida tabiiy gaz oqimi olingandi.

Energetika vaziri Jo‘rabek Mirzamahmudov 85 foiz konlarda bosim juda keskin tushib ketayotganini aytib, buning o‘rnini yangi konlar hisobidan to‘ldirishga umid bildirgandi.